په پاکستان کې د شنبې په ورځ د سنا ټاکنې ترسره شوی چې پکې د پاکستان پیپلز گوند لخوا یوه هندوه کرشنا کماري انتخاب شوه.
د پاکستان په تاریخ کې په لمړي ځل د هندوانو د یوې "ټیټې طبقې" سیاستمداره کرشنا کماري کوهلي د سنا په انتخاباتو کې د پېپلز گوند نه کامیابه شوه.
هم په دغو انتخاباتو کې د پاکستان مشهور دیني عالم مولانا سمیع الحق چې د ازاد کاندید په توگه یې په انتخاباتو کې برخه واخیسته او د عمران خان د سیاسي گوند ملاتړ ورسره و، ناکامه شو.
کوهلي چې ٣٩ کلنه ده، د پاکستان د سند د صوبې د یوې نیستمني کورنۍ سره تعلق لري. د سند په صوبې کې د پاکستان زیاتره هندوان ژوند کوي.
اغلې کوهلې اې پي ته وویل " زه ډیره خوشحاله یم، ما دا فکر نه کاوه چې زه به سنا ته منتخبه شم"
کوهلي وایي چې د هغې مور پلار په هغې تعلیم وکړ او بیا هغې وروسته د یو غیر دولتي موسسې سره کار وکړ. د پاکستان پیپلز گوند چې د بینظیر بهټو سیاسي گوند دی، هغه یې د سنا لپاره کاندیده کړي وه.
مولانا سمیع الحق چې د جمیعت السلام (س) د سیاسي گوند مشر دی، د سنا لپاره یې یواځي ۴ رایې واخیستې. د یادونې وړ ده مولانا سمیع الحق اعلان کړیدي چې د ٢٠١٨ کال په انتخاباتو کې به برخه اخلي.
مولانا سمیع الحق د پاکستان د مشهورې مدرسې دارلعلوم حقانیه چارې هم پر مخ بیایي او د "طالبانو د پلار" په نوم شهرت لري.
د پاکستان د سنا په انتخاباتو کې د مسلم لیگ نون گوند تر ټولو زیاتې یعني د ٥٢ د جملې نه ١٥ څوکۍ ترلاسه کړی. د پاکستان پېپلز گوند ١٢ او د عمران خان د تحریک انصاف گوند ٦ څوکۍ ترلاسه کړیدي.
د ١٥ څوکیو د گټلو سره اوس د پاکستان واکمن د مسلم لیگ نون گوند په سنا کې ټولې ٣٣ څوکۍ لري.
